Bu barədə İsrail XİN-in nümayəndəsi Aliza Bin-Nun “X” sosial şəbəkəsindəki hesabında paylaşım edib. “Azərbaycan Prezidentinin xüsusi tapşırıqlar üzrə nümayəndəsi Elçin Əmirbəyovla səmimi görüşümüz oldu. Müzakirələr zamanı əsasən ikitərəfli və regional məsələlərə toxunulub, Cənubi Qafqaz və Yaxın Şərqdə cari hadisələrə xüsusi diqqət yetirilib”, - paylaşımda qeyd edilib.

Azərbaycan Prezidentinin xüsusi tapşırıqlar üzrə nümayəndəsinin İsrail səfərini qiymətləndirmək üçün ilk növbədə biz hər iki ölkənin müttəfiqlik münasibətlərinə nəzər salmalıyıq. Ermənistanla baş verən istənilən münaqişədə İsrail Azərbaycanın yanında yer alıb, habelə Azərbaycan da Qəzza kimi xüsusi incəlik tələb edən məsələdə diqqətli davranıb, dostları ilə münasibətlərini heç bir tərəfə zərər verməyəcək dərəcədə inkişaf etdirib. Hazırda həm Qafqazda, həm də xüsusilə Yaxın Şərqdə vəziyyət kifayət qədər mürəkkəbdir və çoxşaxəli hadisələrlə doludur.

İraq Kürdüstan Regionunun başçısı İrana səfər edib. İranın nüvə enerji sektorunun rəsmiləri rəsmi Tehranın Səudiyyə Ərəbistanına dinc nüvə proqramının inkişafında texnoloji dəstək verməyə hazır olduğunu açıqlayıblar. Məlum olduğu kimi, İsrail Səudiyyə Ərəbistanına nüvə enerjisi texnologiyalarının verilməsinin əleyhinədir. Qətər və Misir müzakirələr nəticəsində Qəzzada atəşkəs üçün layihə hazırlayıblar.

HƏMAS bu layihəni, eləcə də israilli girovları sərbəst buraxmağı qəbul edib. Qətər, ABŞ, Misir, BMT dördlüyü bunun zəmanətçisi olan dördlük kimi nəzərdən keçirilir, lakin İsrail bunu qəbul etmir və Rəfah şəhərini raket atəşinə tutur. Təbii ki, bütün bunlar Yaxın Şərqdə baş verənlərin hamısı deyil və bəlkə də İsrail üçün o qədər də faydalı deyil. Bu arada İsrail məhz İranın genişlənməsinə qarşı müəyyən addımlar atmağa məcburdur. Lakin bu məsələdə Azərbaycanın mövqeyi məlumdur, region ölkələrinə qarşı heç bir əks addımın atılmasına icazə verilməyəcək.

Bu yaxınlarda isə Azərbaycan Respublikası müdafiə nazirinin müavini – Əlahiddə Ümumqoşun Ordu komandanı general-polkovnik Kərəm Mustafayev İran İslam Respublikasına rəsmi səfər edib. Səfər çərçivəsində İran İslam Respublikası Silahlı Qüvvələrinin Baş Qərargah rəisinin birinci müavini general-mayor Əziz Nəsirzadə və digər hərbi rəhbərlərlə görüşlər keçirilib. Görüşlərdə Azərbaycan ilə İran arasında hərbi əməkdaşlığın mövcud vəziyyəti və inkişaf perspektivləri müzakirə edilib, regional təhlükəsizlik məsələləri barədə ətraflı fikir mübadiləsi aparılıb.

Böyük ehtimalla, Tehranda iranlı generala Azərbaycanın Qafqazdakı balanslı siyasəti xatırladılıb, habelə Ermənistanın Zəngəzur dəhlizi ilə bağlı manipulyasiyalarında sonuncuya dəstək verilməməsi kimi vacib məsələlər müzakirə olunub. Tehran Azərbaycanın, xüsusilə Zəngəzur dəhlizi ilə bağlı tələblərini dəstəkləyəcəkmi? Yoxsa Ermənistanla əməkdaşlıq edərək İsrail-Azərbaycan müttəfiqliyini daha da sıxlaşdıracaq?

Asif Cəfərov
Ordu.az